الفلانتاين

بمناسبة الفلانتاين احب اقول لكل الناس كل سنة وهما فلانتاين مع بعض

بس لازم اقول في الاول ان مفيش حاجة اسمها عيد الحب مش عشان حاجة لكن الحب حاجة اساسية فحياتنا مش محتاجين عيد عشان نفتكرها لان لو كده كنا نعمل عيد اكل المحشي وعيد البيتزا

لكن ممكن نمشيها يوم الحب بس عشان نسامح فيه بعض او نبتدي صفحة جديدة مثلا او حاجة زي كده

بداية انا محبتش ابقى متحيز للمرتبطين واسيب احبائي اعضاء رابطة محبي المجروحين او حتى المبتدئين اللى لسه بيشقوا طريقهم في بداية قصة جديدةاولا هتكلم مع المرتبطين وخصوصا البنات عشان هما اولى مننا بالكلام ده :

- اوعى تزعلي حبيبك في اليوم ده سواء تعايريه باصحابه او بمنظره او اي حاجة هو بيحبها- اوعي متخرجيش مع حبيبك اليوم ده لكن لو مش طايقاه وعاوزه تنفضيلو ممكن تعملي نفسك ميتة وعندك برد جامد ومش قادرة تقومي من السرير ولو عايزة تحبكي الدور صح ممكن تسلي نفسك في اي حاجة وانتي بتكلميه على اساس انك مش قادرة تركزي وانتي تلعبيلك جيم سوليتير عالسريع كده ولو المكالمة هتطول اضربيلك بولة استيميشن عالنت مع اصحابكوهو يجيلك تاني يوم وعاوزك تخرجي قليلو الفلانتاين عدا ومش هينفع خليها الفلانتاين اللى جي وهو من عبطه هيصدقك !!

- اوعي لو خرجتي معاه تقليلو مش هقدر اخد هديتك عشان قرفانة منك او مش عايزة حد يشوفها لكن خديها منه وبعد مايمشي ارميها في اقرب صندوق زبالة تقابليه عشان حرام ميجيلوش اكتئاب عصبي حاد لو رجع بيهاانت متعرفيش هو جبابهالك ازاي ممكن يكون حرم نفسه من حاجات كتير عشان يحوش ويجيبهالك او ممكن يكون راهن الانبوبة عند البواب لكن لو انتى واثقة من انه زي الشراب في رجلك وكده كده هيعديها.. ارميها فوشه وقوليلو ايه القرف ده انت استرخصت الهدية ؟؟

- اوعي تجيبي لحبيبك هدية ( مصاريف على الفاضي ملهاش لازمة مدام كده كده هو هيجيبلك )

- اوعي تردي عليه لو اتصل بيكي عالموبايل لازم تنشفي ريقه عشان تردي عليه ( يعني مش قبل 200 ميسد كول وبتاع 50 مسج ) يعني هو انتى شوية في البلد

- اوعي تنخي وتسامحيه على حاجة غلط فيها ولا بعد ميت محاولة هشان متبانيش ضعيفة قدامه ويسلام لو قفلتي السكة فوشه يبقى قمة التقل

- لو انتوا متخاصمين ومش طايقاه اوعي تقوليله حاجة لكن لازم تفهميه انه زيه زي غيره بالنسبالك ومبقتيش تحبيه وتقوليله ممكن نرجع بس بشرط انك تشوف ودنك !!وصدريله الطرشة على قد ماتقدري عشان يكش ويلم الدور لكن اوعي تبينيله باي نوع من انواع الذوق عشان ميقلش عليكي بنت ضعيفة او غلبانة لازم تبقى ارجل منه !!

لو اصر على كلامه قليله انا مش مسئولة عن شعورك واعرف دكتور كويس بيعالج الحاجات دي !!

مع انك هتموتي عليه او في واحد تاني مشعشع فدماغك لكن قصيه على طول عشان ميبقش معاكي كتير !

اما عن احبائي اعضاء رابطة المجروحين هديلهم الصواريخ اللى جاية دي :

- ليه تولع فنفسك كل ماتشوف حاجة حمرا سواء دبدوب او منبه او ساعة ولع فسجاير مارلبورو منها احمر كمان برضه واحرق في نفسك ولو مش بتدخن مفيش مانع انك تجرب على فكرة التدخين ساعات مفيد للصحة- اوعى تبص لبنت اليوم ده عشان متفتكرش كل حاجة وحاول انك متبصش بمزاجك احسن متخليك عشرين سنة متبصش غصب عنك وانت خلف الاسوار

- بعد ماصاحبك يقلك انه خارج مع حبيبته قول كل سنة وانت طيب وياترى اشتريت ايه .... واول مايمشي حاول تدور على ارخص حاجة واكسرها بدل مترجع تعيط بعد كده !!- حاول متسمعش الـ اف ام كتير وانت سايق عشان التوهان اللى بتبقى فيه مع كل اغنية !!

- لو في محل هدايا قريب من بيتك حاول متدخلش الشارع اللي هو فيه حتى لو اضطريت انك تلف لفة كبيرة المشي رياضه على فكرة وساعات كتير بيبقى ارحم من تمن ازاز المحل المتكسر وايادي المخبرين في القسم بتاعكم !! - حاول انك مترحش الكلية اليوم ده عشان هتلاقي الناس كلها لابسة احمر وشايلين شنط حمرا وراكبين عربيات حمرا و ... و .... و ..... و .....

- حاول انك تبقى مستعد باكبر كمية من اكياس المناديل عشان هيبقى شكلك وحش وانت راجل كبير وبتمسح في كمك !! - ابعد كل شرايط هاني شاكر وتامر عاشور عن الكاسيت وامسح كل اغانيهم من عالجهاز عشان حرام اللى بيموت نفسه بيموت كافر !! واخيرا الى الاخوة المبتدئين :اديك شفت يابني ايه اللى بيحصل للمرتبطين حاول تفك بجلدك واهرب انت لسه عالبر عشان لو كملت مش هتعرف توقف نفسك ومسيرك هتبقى زي عمو اللى بيمسح في كمه